Mradi wa PS3 watoa mafunzo ya utunzaji wa fedha wilayani Kyerwa

Imewekwa tarehe: June 13th, 2017

Mradi wa kuimarisha mifumo ya sekta za Umma (Public Sector Strengthening System-PS3) umeendesha mafunzo ya mfumo wa uhasibu na utoaji taarifa katika vituo vya kutolea huduma  ujulikanao kwa kitaalam kama "FFARS".Akifungua mafunzo hayo ya siku mbili(2) yaliyofanyika katika ukumbi wa shule ya sekondari Bernard iliyopo Rubwera,kata ya Kyerwa Wilayani Kyerwa, mgeni rasmi ndugu  Nassoro A. Ngurungu aliyemuwakilisha Mkurugenzi Mtendaji wa Halmashauri, aliwasisitiza wajumbe kuwa makini katika kipindi chote cha mafunzo ili thamani ya fedha inayopelekwa katika kutekeleza miradi kwenye ngazi za chini za Serikali ionekane kupitia taarifa zitakazoandaliwa kwa kufuata sheria,kanuni,taratibu na miongozo ya fedha za Serikali iliyopo.

Mafunzo hayo yaliyoanza tarehe 12/6/2017 na kumalizika tarehe 13/6/2016 yalikuwa yakiendeshwa na wakufunzi ndugu Robert Mhongera( Mtaalam wa mifumo ya Kompyuta toka PS3),ndugu Audax Barongo,na ndugu Neema Beebwa(Wote ni wahasibu toka Halmashauri ya Wilaya ya Kyerwa) yalihudhuliwa na maafisa elimu kata ,wataalam wa afya  toka hospitali ya Wilaya,na vituo vya afya kutoka kila kata.

Lengo la mafunzo hayo ilikuwa ni kuwaimarisha kiujuzi wataalam hao kuelewa mzunguko wa jumla wa udhibiti wa fedha za umma na mahusiano yanayohusu upelekaji wa fedha moja kwa moja kwenye vituo vya kutolea huduma kama shule ,zahanati ,na vituo vya Afya.