Katibu mkuu kiongozi atoa maagizo mahsusi kwa watumishi wa umma wilayani kyerwa

Imewekwa tarehe: July 23rd, 2019

Watumishi wa taasisi za umma zilizopo Wilayani Kyerwa,leo hii wamepatiwa mafunzo juu ya sheria,kanuni na taratibu za utumishi wa umma kutoka ofisi ya Rais Ikulu katibu Mkuu Kiongozi.

Mafunzo haya yaliyoendeshwa na  wataalam wa Ofisi ya Katibu Mkuu Kiongozi,ndugu Fransis Mangira ambaye ni mratibu wa utawala ,na ndugu Abdalah Said Mangare ambaye ni mratibu msaidizi utawala yalijikita katika kuwajengea uwezo watumishi wa umma kutambua sheria,kanuni,taratibu,na miongozo mbali mbali katika kuhudumia wananchi.

Aidha,katika kusisitiza ndugu Fransis Mangira,aliwasilisha maagizo matano mahsusi toka kwa ofisi ya Katibu Mkuu Kiongozi kwa watumishi wote kama ifuatavyo:-

• Kila mtumishi wa umma kuanzia ngazi ya chini hadi uongozi akae na mkuu wake wa kazi na kupeana majukumu ya kazi.
• Kila mtumishi wa umma katika nafasi yoyote ile aliyopo,katika kutekeleza majukumu yake ahakikishe hachonganishi Serikali na wananchi.Hii ni pamoja na kutoa huduma bila upendeleo.
• Kila mtumishi wa umma ahakikishe anampokea mwananchi na kumsikiliza kwa makini na heshima,ili kuhakikisha anapata huduma vizuri.
• Kila mtumishi wa umma,katika ofisi aliyopo ahakikishe mwananchi yoyote anayetaka huduma, amhudumie kwa unyenyekevu,upendo,utu na bila upendeleo wowote.Aidha, lazima malalamiko ya wananchi yapokelewe na kuratibiwa kwa haraka.
• Kila mtumishi wa umma,ahakikishe anatekeleza majukumu yake,asichanganye utumishi wake na siasa.

Pia ndugu Mangira  aliwasisitiza watumishi kujitambua kwamba wao ni kundi dogo la wananchi wenye taaluma ,uzoefu,na weledi waliobatika kupata nafasi ya kuwahudumia wananchi walio wengi kwa niaba yao.Naye ndugu Abdalah Mangira,akiwasilisha maada aliwata watumishi kufanya vikao vya watumishi ili kuondoa changamoto mbalimbali za kiutumishi,kufuatilia utendaji wa watumishi waliopo ngazi za chini,kuheshimu mamlaka,madaraka na mipaka ya majukumu,kuzigatia maadili ya utendaji wa kazi, na kufuata namna bora ya mawasiliano serikalini.Katika kuahirisha kikao kazi hicho, katibu tawala  Wilaya,mheshimiwa Gyeson Mwengu aliwasisitiza watumishi kuvisaidia vyombo vya ulinzi na usalama kutoa taarifa juu ya wahamiaji haramu wanaoingia nchini katika vyombo vya dola.