TASAF

Start Date: 2015-01-09

End Date: 2020-12-31

Mradi wa TASAF awamu ya Tatu - Mpango wa Kunusuru Kaya Maskini katika Halmashauri ya Kyerwa ulizinduliwa rasmi mnamo tarehe 09 Januari, 2015 na Mkuu wa Wilaya ya Kyerwa Mheshimiwa Luteni Kanali Kitenga baada  ya kufanyika semina iliyoandaliwa na wawezeshaji wa TASAF iliyokutanisha wadau mbalimbali katika Wilaya.

Lengo la mradi  huu ni kuziwezesha  kaya maskini kupata mahitaji ya msingi na fursa za kujiongezea kipato.Walengwa wa mpango ni kaya maskini katika jamii kwenye Wilaya ya Kyerwa.

Walengwa wa mpango wanavyopatikana

Walengwa wa Mpango huu wanapatikana kupitia utaratibu ufuatao:

1. Maeneo ya utukelezaji yatachaguliwa kutokana na takwimu za viwango vya umaskini katika maeneo yote Wilayani na kupewa fedha za utekelezaji.
2. Jamii katika maeneo husika zitachagua kaya maskini sana ambazo zinakidhi vigezo vya kusaidiwa kwa njia ya kitaalam inayoendeshwa kwa mfumo wa kompyuta utapitia na kuchuja majina ya walengwa walioorodheshwa ili kubaki na wale tu wenye sifa za kuwa kwenye mpango.
3. Majina ya walengwa watakaopatikana kupitia mfumo wa kompyuta yatafanyiwa uhakiki wa mwisho na jamii husika ili kupata walengwa wanaostahili kuwepo kwenye mpango chini ya usimamizi wa Halmashauri za Vijiji.

Maeneo yanayotiliwa Mkazo                       
 TASAF awamu ya Tatu-Mpango wa Kunusuru Kaya Maskini Zilizo Katika Mazingira Hatarishi unatilia mkazo maeneo makuu yafuatayo:

1. Kunusuru kaya maskini kwa kuzipatia fedha ambazo zitasaidia kwenye uzalishaji mali ili wapate manufaa ya muda mrefu.
2. Kutoa ajira ya muda mfupi kwa walengwa wenye uwezo wa kufanya kazi kutoka kwenye kaya maskini na kuzipatia stadi mbali mbali.
3. Kukuza na kuchochea utamaduni wa kaya maskini kujiwekea akiba na kuzipa elimu juu ya masuala ya fedha na uendeshaji wa biashara ndogo ndogo.
4. Kuwezesha jamii maskini kujenga/kuboresha miundombinu ya maji,elimu,na afya katika maeneo ambayo hayana huduma hizi ili walengwa wapate kutumia huduma hizi ikiwa kigezo cha kutimiza masharti ya Mpango.
5. Mpango utasisitiza ushiriki wa Walengwa ili watoke kwenye Mpango wakiwa na uwezo wa kujikimu,kupata chakula na kujikita katika shughuli za uzalishaji na kuwekeza.

Sehemu za Mpango
TASAF awamu ya Tatu-Mpango wa Kunusuru Kaya Maskini Zilizo katika Mazingira Hatarishi una sehemu kuu nne.Sehemu hizo ni:

1. Kunusuru kaya maskini na zilizo katika mazingira hatarishi.
2. Kuinua hali ya maisha na kuongeza kipato.
3. Ujenzi wa miundombinu katika maeneo maalum.
4. Kujenga Uwezo.