CHAMA CHA MSALABA MWEKUNDU MKOA WA KAGERA CHALETA HAMASA MPYA KWA VIJANA

Imewekwa tarehe: December 30th, 2025

Chama cha Msalaba Mwekundu Tanzania (Tanzania  Red Cross  Society-TRCS) kwa kushirikiana na Baraza la Vijana Mkoa wa Kagera kila mwaka hufanya kambi ya vijana yenye lengo la kuwapa fursa ya kupata elimu na maarifa mbalimbali ya maisha ambayo ni ujasiriamali, ubinadamu na kujitolea katika jamii.

Akifungua kambi hiyo kwa mwaka 2025 kwa niaba ya Mkuu wa Mkoa wa Kagera, Mkuu wa wilaya ya kyerwa Mhe. Zaituni Msofe amewataka vijana hao kuzingatia maadili ya kiafrika pamoja  na kuwa wazalendo wa nchi zao.

"Tunapofanya kazi zetu tuzingatie maadili ya Kiafrika lakini pia tuzingatie uzalendo wa nchi  zetu, hakuna atakayetoka nchi nyingine aje aipende nchi yako hivyo basi uzalendo ndio kipaumbele chetu," amesema Mhe. Msofe

Aidha Mhe. Msofe amewataka vijana kutumia fursa mbalimbali zilizopo, ikiwemo mikopo ya vijana inayotolewa na Halmashauri  ili iweze kuwasaidia katika  kuwaletea maendeleo na kukuza  uchumi wao.

Awali Mwenyekiti wa TRCS Mkoa wa Kagera  Ndg. Leonard akieleza lengo la kambi hiyo amesema  sio kuwafundisha vijana kupambana na majanga tu bali ni kuwafundisha namna ya kupambana na umasikini kwa  kuwajengea uwezo wa kiuchumi ili watakapotoka  wakaanzishe vikundi vya wajasiriamali vitakavyo wasaidia  kujikwamua kiuchumi.

Kwa mwaka 2025 Kambi hiyo inafanyika katika Ukumbi wa Shule ya Sekondari Mabira Wilaya ya Kyerwa  kuanzia tarehe 28 hadi 30 Disemba 2025 ambapo jumla ya vijana 500 wa Mkoa wa Kagera na vijana waalikwa kutoka mikoa ya Kanda ya Ziwa na nchi jirani za Burundi, Rwanda,Uganda, Kenya, na Sudan kusini wameshiriki katika kambi hiyo.