Mheshimiwa Marco Gaguti, agawa miche bora ya Kahawa Wilayani Kyerwa

Imewekwa tarehe: November 10th, 2020

Mheshimiwa Brigedia Marco Gaguti  ambaye ni  Mkuu wa Mkoa wa Kagera,leo tarehe 9 Novemba, 2020 amegawa miche bora 300,000 ya Kahawa kwa wakulima.Mheshimiwa Gaguti aliyekuwa ameambatana na Mkuu wa Wilaya ya Kyerwa, mheshimiwa Rashid M. Mwaimu aliwapongeza wakulima wa Wilaya ya Kyerwa  kwa kuongeza uzalishaji wa zao la kahawa kutoka tani 56,000 kwa msimu wa mwaka 2019/2020 mpaka tani 74,000 kwa msimu wa mwaka 2020/2021.

Akihutubia katika mkutano uliofanyika katika kitalu cha miche cha Nyabikurungo, kilichopo kata ya Rukulaijo Wilaya ya Kyerwa, Mheshimiwa Gaguti alisema “Nawapongeza Chama cha ushirika cha Karagwe na Kyerwa (KDCU) na taasisi ya utafiti wa Kilimo ya TAKRI, kwa hatua ya kuwezesha wakulima kupata miche hii kupitia vyama vya msingi vya ushirika.Ni imani yangu miche hii, itaongeza tija na thamani kwa uzalishaji wa zao la Kahawa”.

Aidha, Meneja wa KDCU  ndugu  Oscar Dominic alielezea kuwa lengo la ugawaji wa miche hiyo ni kuongeza ubora na uzalishaji wa zao la kahawa kwa wakulima.

Wilaya ya Kyerwa ina jumla ya vyama vya ushirika 74 ambapo vipo chini ya mwamvuli wa chama kikuu cha ushirika cha KDCU.